開始買貨

跌勢定了，美元回穩，今日開始幫媽媽及自己買貨，今次買貨比較穩陣，減小資源股比例，加入大陸銀行股，心目中比例大概會係
40% (347 + 2600)
10% (3377)
50% (939+1398+3988)

希望下年有50%進帳

阿里巴巴與狼來了

昨日阿里巴巴上市，升到顛左，公司D人都好興奮，相信有人已經沖暈頭腦，隻狼企響後面都唔知，我就站在一面睇下算了。

二千億市值的B2B web site，以我二流程式員身份及兩年前讀E-Commerce時對阿里巴巴的study，我真係睇唔出佢點賺錢去為持依個市值。B2B真係可以賺大錢?我就唔信，可以的話，為可美國冇同類web site可以脫穎而出?(美國是internet公司最易上市搵錢地方)

近排因感覺得個市太高，有些風險不能承受，同時網上有位高人提醒金匯股的古怪走勢，應該似大戶想脫身所為，所以cash back 大部份錢等買平貨。自己及媽媽的股票減持了很多，除了長揸的IPO股及渣打匯豐，手上只餘下小量1919和1088及大量739。

現在大部份股票profit已袋袋平安，慢慢想下一步好過，但 monthly stock 會照供，IPO及渣打匯豐會照揸。

依家老散越來越小人相信個市會死，加上阿里巴巴，佢地只會怕賺唔到多過走唔切，叫狼來了時佢地只會聽到係錢來了！


哈哈九流通訊工程 篇 清倉… 裡的大時代 capture 圖有D似依家個市...

IPO

依個月有好多隻股IPO，打頭陣ge恆鼎因有四叔參與，散戶自然安心地熱烈參與，非常興旺。我雖然極之睇好煤市場，但因為手頭已有神華(1088)和兗州煤(1171)及恆鼎唔係國企，再加上銀根有限及手上沒有祖國地產股，結果都係將錢集中抽地產股作長線投資。

IPO我並非次次參與及非作短線炒買，加上自己運氣一般，所以手上IPO ge 股票只得六隻，而另一隻地鐵(66)是以我名義幫父親IPO。手上六隻股票分別係

500股 823
2000股 2328
500股 2388
2000股 2628
500股 3968
1000股 3988

本金大概二萬七千元，以昨日收市價計大概十三萬左右，股息沒有計算在內，回報非常高。當然我主要是選保險及銀行，我相信Tony所講，這兩個行業係錢搵錢。記得幾個月前和朋友食飯，透露了自己手上有兩手IPO的中人壽，他們都報以羨慕眼光，好像問何解可以揸咁耐。

以前聽了朋友母親揸匯豐發達的故事，我覺得我未必做到定期買一手(無咁多錢，不過依家有參與月供計劃)，不過我可以模仿(長揸好股 + 股息再投資)。我會把自己的部份餘錢當儲蓄或退休金選擇優質公司去IPO，其實只要係優質公司，相信三四十年後翻幾翻不難，成積一定好過強積金。我會用白表IPO，因為賣出麻煩及收股息唔使比手續費。這批股票除非有需要，否則不會賣，會當作退休或自己有事給家人的一點錢。

其實IPO的股票不一定用於短線炒賣來賺錢，但大部份人係為求短線利益。我IPO主要是用小錢去投資一些有潛力公司而唔係潛水公司，只要公司運作得好，倍數升值不難。

我覺得好多人買股票不能賺到大錢主要
1. 注重眼前利益殺雞取卵 - 當賣掉一隻好股票時，好多人心目中己經有個一障礙，係唔會響高過自己賣出價買回，因為會覺得貴，但其實對那隻股票真正價值一無所知 。這點需要多學習分析公司狀況，我在學習當中。
2. 以為股票只是高賣低買的遊戲 - 邊個可以做得到？有錢主導市場果一群人就可以令動盪而高賣低買，散戶可以跟到幾多次？好多老散贏粒糖就賣，輸就磨爛蓆

重有....遲D有機會再寫

次按問題

次按問題攪到滿城風雨，本來在大陸超強勁經濟增長帶動下，個市理應升爆燈。但subprime 新聞日日聽，手尾應該好長。依家D人就變左日日都驚個市有股災，到依個位個我依然相信，早國依頭火車可以繼續帶動全球。

之前 8-17 買的股票表現非常好，除左匯豐其他有兩至三位ge巴仙收獲，成績唔錯。

前排睇過份report 講渣打，雖然佢無投資 subprime 產品，但佢投資旗艦公司揸左好多 subprime 產品，所以依排買銀行股要小心，間接影響都可以好大。至於手上揸ge渣打同匯豐係作 roll over 投資，唔係非常情況係唔會賣。

而有樣野想比大家參考，次按問題影響下，買股最好考慮地區同類別相對被次按影響的程度

(在亞太區)
地區:
台灣、日本 (影響最多)
澳洲、香港、馬來西亞、泰國、星加坡(影響中等)
中國、印度、印尼、菲律賓 (影響甚小)

行業:
電腦硬件、半度體、汽車、交通運輸 (影響最多)
地產、礦產、耐用品、銀行、建築材料、化學品、鋼材、工業、電腦軟件(影響中等)
電力、能源、日用商品、保險、傳媒、電訊(影響甚小)

資料來自一個report，希望可以幫到你。

四叔買乜我買乜

上星期睇到報紙報導，四叔在八月十七日(HSI大跌…千二點果日)用左廿億掃貨，當有D我都有買和之前持有。至於四叔買ge可歸類為

1. 超級增長股中人壽，林森池先生所講ge千里馬，想知點揀千里馬ge朋友可以參考林森池先生著作'平民資本家' (我有兩手IPO揸到依家)
2. 國內地產股，因為我不大認識大陸地產我無持有。不過一個國家開始經濟起飛，離不開食好D住好D，需求增加自然有利內須股同地產股，情況有如廿年前的香港
3. 煤電股，成市化會令電力需求增加，而且阿公無打壓煤價
4. 鋼鐵股，大陸重有好多大型基建要開工，鋼鐵水泥不可小，水泥 (914)已經升到開巷水位有限
   

我同四叔眼光都差唔多....hehe......我估主要原因其實係我同佢ge information source係相近.....當然我果D無得同佢比....

可能加埋四叔效應今日個市升到顛左！朋友如果你想入市，買之前計一計D水位同明白自己係長線定短線先買，因為恆指同國指累積升幅真係唔小。

星期五同Yoki夫婦食飯，講開上次我響佢鋪頭開股票投資入門的學員(果次純粹教佢地D基本野，我無收錢)，大部份都無聽我講買我講ge股而走去玩細價股，可能好多人認為玩股票係為左短時間搵錢，而忘記我所講的投資本義同老千股ge危險性。我之前的文章亦有提及過，有緣ge朋友希望你參考一下我所有投資, 股票標籤的文章，當然歡迎你比comment我。

我想如果佢地照我講去買(當中包括四叔有買果D)，40-50% profit 唔難做到，不過中間上落可能佢地EQ未足夠應付。

用另一方向想，佢地早D響股市損手學乖好過臨老輸鑊甘。

阿公派錢

星期一阿公比大陸資金自由行，明益香港，咁睇法，香港真係會有一個超級大牛市。所以果D所謂民主派唔好成日話阿公依樣唔好果樣唔好，實制D幫D低下層公人爭取，打壓D無良商人同判頭重好。連三餐都攪唔掂點講民主？ D無良商人同判頭地的確搵左好多低技術勞工好多血同汗，真係要quote 一句 "Can you feel the sweat and tear?"

開頭睇新聞，見工人的衝動行為我有D討厭，睇番D報導同雜誌先知佢地好慘，無乜人幫，開工不足，比人拖數走數，知識水平低，不懂表達，加加埋埋，以致他們不懂溫和地爭取，可以理解。看一看，我有點兒覺得有部份問題是由講求效益多於人情的美式管理方法所致，因為中國人世界好多人都係比較重義氣和感情。D有錢佬響香港賺咁多錢，應該為D弱勢社群做D野。

講返阿公派錢，最大得益應該係中銀、中銀香港、港交所、大型H股、大型紅籌同為人認識的大藍籌，所以你應該知買乜，點都唔會係買老千股…

除左股市，錢到時香港，經濟亦會被會帶動，香港人會得益不小，不過真係要打壓D無良商人同判頭。

真係要多謝阿公比咁多優惠香港。

牛刀小試

今日牛刀小試，買左鋼鐵雙雄 323 同 347 ，價錢貴左好多，不過值博率唔低，希望有 50% return

今朝有support做，做完先出門口返工，十點左右經過樓下銀行，見到水靜海飛，以前見果D師奶、公公和婆婆都唔見曬，我估上兩星期好多人都傷亡慘重止蝕離場，有D就唔敢入市。好彩上兩星期忍倒手先買到平貨。不過依水之唔知係危定機，我感覺係機會，因為大陸增長非常强勁，無跡象會停，加上兩星期跌市及最後大插，好多散戶手上的貨已被震出，大升可期。

以上純熟個人睇法，只供參考

細佬急電

今日個市跌到嚇死人，本想等多陣先幫媽媽同自己入貨，食飯時收到細佬急電提醒買貨

因為唔知見底未，只通知了兩位好朋友買貨，唔知佢地有冇撈貨…
響跌多過一千多點果刻買了
0005 @ $131.8
1088 @ $22.5
1919 @ $9

不過未知是禍是褔，而且淨幫阿媽買左自己唔記得買…

又跌市

昨日美國又大跌，次按依單野真係好大鑊，三兩日就出單新聞話有銀行或對沖基金奶野，依次手尾好長，有時覺得依幾十年好多衰野都係美國佬攪出黎……

上星期收到朋友 E-mail 問次按會唔會攪到股災，我覺得會，已知ge都影響好多大銀行，歐洲有份，日本未知，所以重有好多未知數。非常好采係大陸D錢唔係自由流動投資海外，兩大保險無事，中銀十億美金不太多，其他銀行未公佈，不過業務增長非常強勁絕對cover到，再加上國內經濟增長強勁長線依然好。而國企在香港已舉足輕重，香港衰極有個譜。

我估香港 20% - 30% 調齊在所難免，現時最好keep cash，分四五注，等跌多20%先開始落一注，以大概5%一格，跌一格就買一注，當然要買國企優質股而唔係老千股。到零八年就可以開開心心迎奧運！

要留意渣打銀行，業務增長非常好，次按對佢影響好小。

QDII

上星期阿公放寬QDII投資去舒緩A股泡沫，此舉非常明智。

經過幾次增加銀行儲備金後，國內人民投資意慾沒有減卻，有很多人有錢但沒出路，亦有人賣田押屋去炒股票。國內股票好多 P/E 已經去到三十幾倍依然繼續升，無辦法，因為僧多粥小。國內人民投資情緒高漲，如果繼續落去，爆起上黎真係唔講得小，而且以今時今日中國的經濟影響力，只要一出事，相信全世界冇一個國家可以幸免，會比 1997 及 2000 果劑大鑊好多。

阿公這樣做令到幾方都得益
1. 可以達到某情度的洩洪效果，有些錢不用夾硬投資溢價偏高ge A股。
2. 肥水流入自己田，某情度上令香港人得益，有錢到自然有好多公司有發展機會，希望香港人會珍惜阿公比ge野，唔好一味話阿公唔民主，飯都冇得開時講乜鬼民主呢？
3. 亦可縮窄 A/H 股差價，令到A股間接地溫和地調整，比較健康。

而之前自己或幫阿媽買落ge H股 (江西銅、兗州煤、神華能源和大唐發電) 今日都升左唔小，飲得杯落，真係要多謝阿公。

之前有朋友買左D中石油及港交所窩輪響今日起死回生，真係皆大歡喜。

而且今日收到廖師傅來電，知道阿文亦可做到冷靜地克制自己，非常好，人生漫長，希望佢繼續學習繼續進步。在亦很感謝阿文接納廖師傳和我的說話。

至於我好朋友九流通訊工程師亦賺到今年使費，應該有餘錢請我去旅行....hehehe.....睇到就識做啦

投資的首要條件 - 本金

前日得到廖師傅傳消息，得知阿文在近日升市中，將之前在窩輪市場上差不多輸定了的大量金錢奇蹟地減到很小，真係值得高興，亦舒了一口氣。希望佢會珍這次上天給他的機會，從次寶貴的經驗令佢有所領悟及得益，亦希望佢多些參透一些佛學哲理(我有些班門弄斧)，克服一些人性的習陋，相信對佢人生、事業及日後在投資市場上的活動有所幫助。

但同日亦收到另一位朋友來電說買了中石油窩輪，真係有點不高興。第一，在對話過程中發覺佢對那隻窩輪所知不多；第二經過了好消息出爐及大升後，基本上上升空間有限，追入風險非常高。相信經過這幾天中石油回吐佢已經唔見左40-50%，雖然果筆錢對佢來講只是雞毛蒜皮，但對好多人來講是一個不小的數目。

近排有些唔開心，聽到身邊越來越多日參與老千股和窩輪買賣，很多人離不開個"貪"字。真心說我亦很貪，初出茅廬時，因誤信親戚提供的老千股輸了不小錢之餘，重連累好朋友。我本是一個比較口密的人，只講比幾位最好的朋友聽，偏偏就累了最好的朋友(當然包括九流通訊工程師)，真係好心做壞事。近幾年，因一些機遇學識一些投資知識及得到珍貴的市場消息，雖然輔助九流通訊工程師賺左唔小，但今時今日重有些耿耿於懷。

老千股經常可以在市場千極都有人落疊，主要運用了人貪的心理及巧妙地運用人與人之間的信任。

今時今日我學乖了，貪之餘我會加上風險考慮。要知道在投資市場上機會多的是，令願放過都唔好買錯。而且投資市場是錢搵錢的，入投資市場搵錢首要條件是有本金，沒本金就等如Micheal Jordan六犯離場，知道自己落場一定贏，但根本沒法落場只可眼睜睜地睇。

如果在這次升浪中輸掉大部份錢，在下次升浪來臨前可以儲到的錢是不會太多，本金有限時一定會錯過了之後升浪的機會。所以很多不注重本金的人每每在每次的升跌週期中輸掉本金、儲錢、輸掉本金…，只會不繼在牛熊週期中原地踏步、或在當中被foul出局…

所以我主張本金安全增值是首要考慮。

用直覺或潛意識去做事

上星期六上了方老師 講解的一個課程，其中講到一環是透過之前教的動功修練令到身體敏感起來，可以感覺到一些時情，而不是經過腦部思考而得出的感覺。

以我理解似是去增加個人的直覺或潛意識，幫自己感受到一些事情或作出一些不經思考的快速決定，好像機動戰士卡通中阿實及加美尤那類新類型人可以憑直覺或潛意識去作出一個好快決定或感受到一些不是肉眼到的事情。

因為很多情況下邏輯性思考須時及在思考期間會受到一些東西影響，如過去經驗、眼見耳聞及週邊環境等等...

方老師 亦舉了一個他日用例子，在揀選股票的時候他會用直覺或潛意識，方法是揀一些每天漲停的股票看一看他的K圖，記下圖的感覺，當要揀股時候就以看圖，用感覺去揀，就如劇集大時代中方展博在台灣時用自己對股票的感覺去買股票，最終能賺很多。雖然這個方法看似荒謬，但方老師用這個方法得出的成積真不錯。

我亦有一次比較深刻經驗，幾年前，一次當對六合彩之前(六合彩已開彩)，我有一個好强烈而以前未試過的感覺覺得自己會中，結果真係買七個字中左四個字派千多元，以前未試過中咁多錢，這件事之後令我相信真有其事。

千王群英會再續

經過上星期的調整後好多冇實質支持的股都跌到一仆一碌，跌30 - 40% 以上都有唔小，但我相信並未完結，因市場仍有好多散戶資金未被吸盡，很多老千仍有利可圖，經反彈後，他們繼績舞弄股價，証監繼績吹佢地唔漲，繼績有打手為佢地散消息，繼績千王群英會。現在互聯網的流行令到消息可以傳得更快更廣，近排經常見討論區有D老千打手出沒散播消息，如

老千控股，現價$1老千話入話睇 $2
齋講地產，現價$1老千同D莊家收曬貨，貨源歸邊，$2 無難度
茂利國祭，現價$1, 要買就快，茂利老細話下星期炒上入 $2
搵笨集團，現價$1, 老細話下星期公佈消息轉盈做石油，消息一公佈果日就炒上$2

依D消息，信佢一成，真係雙目失明！
不過好多貪心股壇初哥同好多心存僥倖散戶都會落疊，次次牛市階段都見唔小人奶野。

題外話:
如果想參考一些實例，一些上市公司點樣用有問顯手法去搵笨小股東，我建議你睇睇 Tony 有一本著作，書名唔記得，淨記得本書有分 「實戰篇」同「理論篇」。

當中文章是 1999 – 2000 所寫的，現在番閱亦印證了他獨到的說法是正確，例如當時盈動買殼、不斷發股、炒上及鯨吞八號仔，在大眾叫好下，但他在自己理性分析下卻持相反意見。本人覺得如能參透及執行書中道理，在股市上搵食，雖不可大富大貴，但可穩中求勝。

而我在股市浮沈多年，得到以下經驗希望可以幫到你

• 理性分析，冷靜行事


• 遠離老千股


• 不要投資沒有實質資產的公司，不要投資市值低公司，不要參與毫股仙股賣買，坐艇時，股本通常只會被不斷分薄(合股和批股等)，係無乜可能返身


• 人類經濟活動一定會在股票市場上反影，它可以幫助你預計及選擇有潛力的股票


• 必須留意其他經濟消息如外匯、經濟數据、期貨市場動向，因為它他們和股市息息相關


• 物極必反


• 不要考驗自己運氣或智慧，自以為自己可以做到在市高點放低點買


• 無論牛市或熊市都要做功課，除非不再玩股票


• 不要信果D股壇神棍，如10%止賺止蝕白痴做法，簡值係同銀行股票行打工，咁玩法，輸part都輸死你 ……，信神棍不如信自己分析

都係果句 - 本文內容純熟幻想，如有雷同實熟巧合

千王群英會

睇完九流通訊工程師 果篇千王之王 後我亦想在此寫篇千王群英會 。

近排股市真係千王群英會，十大成交竟然有的非大型企業而又唔係IPO 公司榜上有名，十大升幅更加有的股的升幅是以倍計，跟手有好多公司出曬黎玩狂升狂跌狂抽水

果D公司老千公司當然唔可以在此響名，但我會列出公司特性以作參考
1. 公司沒有實質業務，市場興個樣就話做果樣，如Y2k做internet、前兩年就做賭做石油等等...果D公司得個講字，做就冇la
2. 公司經常炒高批股，溝到散戶D股本有咁淡得咁淡
3. 公司經常改名洗底
4. 長時間位列仙班毫班，但突然大升
5. 公司經常有炒高公佈完消息就大插
6. 個市唔好時公司就玩六神合體，10合1，100合1
7. 公司通常無PE，因為D收入會落左某D人個袋或變左D董事屋董事遊艇等.....
8. 重有好多...

---

Example
XXXX（XXXX）公布，該公司於昨日向不少於X名獨立人士，發行為期x年的零息可換股票據，到期日收益率每年約９厘，每股初步兌換價XXX元，較停牌前收市價XXX元折讓１x.xx％。
倘若ＣＢ悉數兌換，該公司將發行約xx億股股份，相當於現行股本３x.xx％，及經擴大後股本２x.xx％；公眾持股亦由８X.XX％攤薄至６X.XX％。

放消息，炒高，發債吸水，攤薄，散水，股價大插水，10合1，100合1，等下次牛市改名，放風話玩概念，炒高......循環不息，最抵死係次次都有人落疊....
獨立人士唔知係唔係自己友?

---

睇睇你手上股票的公司中左幾多點，多就要小心D
個人想法，總知買果D老千股票就不如捐左去做善事好過 ，不過入得股票市場的人十居其九都係貪，而貪心的人最易衰在老千手上 (正如千年蟲杜蟲藥都有人信)，唔係點解次次股災都好多人'領野'，但情況係循環不息？


(本文內容純熟幻想，如有雷同實熟巧合)

自己投資及替家人投資

最近香港股票市場相當興旺，相信大部份人賺唔。雖然如九流通訊工程師 的 BLOG 所講，我地係股市明燈、MIB(Man in Black) II 組合，但這兩年在投資市場都有不錯的斬獲。而這兩年亦有為媽媽的儲蓄作投資，收獲比佢擺定期炒外匯為多，有大概七十幾個巴仙，成績相當不俗。相信不小人會替家人投資，但因為性質和自己投資非常不同，希望在此分享一下。

自己投資

因為是自己錢加上自己後生可以比較進取，所以我會用九十個巴仙作投資十個巴仙作流動現金，九十個巴仙中的三分一會作基金投資，三分二會作股票投資；在股票投資的部份，一部分買大型穩定銀行股(本人比較喜歡銀行股)如匯豐渣打及IPO一些大型股票，作為中長線投資，收息加升值有穩定收入；一部分買中至大型國企股，作為中短線投資，揀國企股因為從朋友得到一些資料，知道中國近年發展迅速，國企股過份under-value，很多國企股值得買入。

本人絕不贊成玩生工具，因為
1.必須很貼市，唔貼市，可能開完一個會就會唔見一半。
2.心理質數要非常高，因為上落變化好大，唔係好多人可以好冷靜咁做買賣。
3.越多買賣，給自己的壓力越大，揸貨過夜就驚足成晚。
4.好似warrant，係零和遊戲，好比大行開莊，佢地賺硬一部份(如果唔好搵D輪就唔會越出越多)，淨低果部份就由散戶在佢地開的枱上斯殺，黎一個財富轉移。重有最奇妙就係，正股升跌對應warrant可以背道而馳，甚至有時厲害到正股股價跟warrant走而唔係warrant輪價跟正股走。又見唔小warrant可以好離奇地在行使日行使唔到，行使日過候正股股價好似坐火箭。如果比我揀買warrant定賭波賭馬，我會揀後者，我覺得勝算大好多而且輸左部份錢都可以做到善事。

替家人投資

因家人年事已高，可承受的風險不高，加上過多的投資資本會給我很大壓力容易做錯決定，所以我會以保本為大前提，我只會把十巴仙左右作投資，其他會放定期。

揀股及買入也會比較緊謹，如上年揀323因股價過份低，但我都要等到$2.4x才買入。

而且我會經常匯報股票情況，每個買賣都有匯報才執行。一來條數清清楚楚，二來家人亦放心。

而無論自己或替家人投資我都會用Excel去列清楚所有股票買入價、賣出價、現價、持股量、手續費等等.... 方便自己清楚地決定買入賣出、計算回報及review。

重要經常同家人講，給他們有個意識股票是有相當風險的不是必賺，現在市好才有這樣好的回報。興幸我媽媽明白其中道理，不盲目追求高回報，我相對壓力不大。而我亦有向弟弟說教，訓示他玩股票是必須學習而不是甚麼都不用明白只跟消息，很高興他現在亦有去睇同學。

最後祝大家都可以響股票市場賺大錢。

一老一少的對話

近排香港股市非常暢旺，週圍都可聽到人們興高采烈地談論股票。上星期六早上返工， 在小巴亦聽到後面一老一少談論股票，我記得內容大概是

老的說：某某前在 $4.1x買了3988， 升到 $4.3x， 賺了幾千元，報團去旅行.....
少的說：股市就來要調整了不要再亂做買賣了....
老的說：那我就下星期賣了 XXX 股票，等低位再買入
少的說：XXX 股票，你係長線投資股,，而且係低位入又係穩陣股沒必要又賣又買......
老的說：我依家放左等低位買返就重好啦....

少的就繼績語重深長起地解釋老的聽不要買掉長線投資的股票，此時我也落車了，希望少的可以說服老的....

從這段對話中我亦有以下看法，希望看到這篇劣作的網友可以有些啟示

1. 其實投資者應該知道，資本是透過投資再投資一點一滴累積出來。如果每次把賺來的錢使掉，基本上你的資本是沒有增加，舉例說A有$100000投資，但A會把投資賺來的使掉B有$100000投資，但B會把投資賺來的再投資
   假設 A 和 B 的投資回報都是每年10%, 十年後,
   A賺到 10 x ($100000 x 10% ) = $100000
   B賺到 $100000 - ($100000 x 1.1 x 1.1 x 1.1 x 1.1 x 1.1 x 1.1 x 1.1 x 1.1 x 1.1 x 1.1) = $159374
2. 作為長線投資，是不應該經常想高沽低入，本人覺得只須要在合適價位買入, 等待股票升值就可以了，沽出股票應該是當
   1. 公司質數變差 ，例如和黃3G業務沒收入之餘重要使用公司大量資金。
   2. 公司業務差缺乏投資價值 ，例如好多八字頭的公司。
   3. 股價非常偏離公司價值如中人壽。
   至於怎樣衡量一間公司是否值得投資就要睇公司的數據資料(有機會遲些討論)再者本人相信除左有消息或有能力操控市場的人才可做到高沽低入，一般投資者絕不能做到。