2008年5月6日星期二

阻人發達定阻人去死?

依幾個月真係忙個不停,個 project 出左街,叫做識行識走,非常好彩,不過依排老細又想加野去討好高層,好唔係唔好,不過人手就非常緊,我自己做D implementation job 己經做到踢曬腳,邊有咁多時間靜靜地去desing?本想放假去玩玩,不過睇黎有D難度

上星期日發生左一件不愉快的事,我都唔知我係阻人發達定阻人去死?

其實上星期日九流工程師約我同黑鬼去籃球場射下波,之後就去茶餐廳飲野吹水。在茶餐廳,黑鬼就開始問我同九流一個問題,大約係佢想賣左依家層樓再套現一百萬,等樓市低時再買返,至於住屋問題,就用平時供樓筆錢再加上套現果筆錢每個月搣多大約五千元去租樓一個大單位,識佢咁多年,我同九流心中盤算佢咁做同自剎無分別,黑鬼現狀係

1. 人工只係我的一半,但我人工唔算高只係一般中位數
2. 一家四口只得佢一個人做野,一個女就黎讀小學一個就剛出世
3. 人到中年,賺錢能力最高的時候已過去,雖然本身份工算穩但應該無得發圍
4. 至於佢做野能力就唔知,但以前做同學時覺得佢係中下,人就當然唔係smart
5. 每個月都無乜錢淨作儲蓄

本來佢話頂唔順,賣左層樓租個細單位減輕壓力,我覺得無問題。但係佢個做法係剎雞取卵,將自己唯一資產變買黎洗真係等死。而且我相信佢無能力可以用果筆錢去再搵錢。

九流就用好婉轉方法嘗試去說服佢,而我就直接拋左幾個問題問佢,大概係
1. 佢點可以知道樓市頂同底 ? 佢唔知
2. 佢老婆點唸? 佢答老婆無意見
3. 係唔係有其他人壓力先咁做?佢答唔係
4. 佢估佢自己有幾多歲命 (想隨著問佢可唔可以響有生之年供到子女讀完書同,萬一出左事佢D老婆仔女點算?但佢都無理我)

不過佢覺得我玩野,求其答我。最後九流同佢長篇大論完,佢又返轉頭又再同九流分析,我覺得佢係想說服九流去認同佢。這時我已經心裡有數,講落去都係浪費唇舌,我就不繼同九流講由得佢做啦,最後佢發火鬧我,之後不歡而散……我頭也不回走了

我得到一個結論,道不同不相為謀,依個人已經唔係我朋友,之後佢發生任何事我都唔會理,最後祝佢屋企人(exclude 佢)之後無風無浪生活愉快。

3 則留言:

九流無網絡量地官 說...

算啦!有時朋友就係咁,大家就下啦!黑鬼都係講下,以佢議而不決性格,我唸佢都唔會真係做!其實我唔反對佢套現,不過唔應該無計劃又無準備後路下做!

其實我作為家庭支柱,都明白佢壓力好大又無錢係手個種恐懼感!唔好講佢無儲蓄,我前排止完蝕都未入肉,我老婆俾阿仔張學費單我,我都突然有多少恐懼感!

你又知佢成世人心裡都覺得比唔上人,佢把口就同你講無問題,但我覺得佢肯定察覺到有d野,我地又連佢個最後希望都打沉,所以有時難免會燥少少!

二流程式分析員 說...

問題係佢有無想過佢一有病,佢全家可以收檔,加上中小學階段要用的錢比小朋友時多好多,佢有冇想過個女點發展,真係如佢所講「天生天養」?

做左咁多年野都係咁梅,應知問題所在係佢競爭力超低,依個先至係佢首要解決問題...

至於手上有錢我覺得佢好快
1. 好多人問佢借錢 (我家姐以前賣完樓比朋友知道,傳下傳下就有D好耐無見的朋友出現借錢,佢衰心軟,當然一借無回頭)
2. 玩股票,但你佢會信消買定學懂分析先買?

九流無網絡量地官 說...

呢d野唔駛你講我都知…甚至佢自己都可能知。不過正如阿Ben以前所講,你代入返佢去唸,可能又會明白點解佢有d咁怪唸法!佢問題係結構性…而且唔係佢一個人問題…好難解決…佢自己亦應該已經明白…所以先唸得出呢d怪方法!

唔好講借錢俾人…佢有錢係身唔駛大我就切咩都得!